תנ"ך מנוקד

תנ"ך - שמואל - הכול
שמואל א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא - שמואל ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד

שמואל א פרק ח

א ויהי, כאשר זקן שמואל; וישם את־בניו שופטים, לישראל. ב ויהי שם־בנו הבכור יואל, ושם משנהו אבייה--שופטים, בבאר שבע. ג ולא־הלכו בניו בדרכיו, וייטו אחרי הבצע; ויקחו־שוחד--ויטו, משפט. {פ}

ד ויתקבצו, כול זקני ישראל; ויבואו אל־שמואל, הרמתה. ה ויאמרו אליו, הנה אתה זקנת, ובניך, לא הלכו בדרכיך; עתה, שימה־לנו מלך לשופטנו--ככל־הגויים. ו ויירע הדבר, בעיני שמואל, כאשר אמרו, תנה־לנו מלך לשופטנו; ויתפלל שמואל, אל־יהוה. {פ}

ז ויאמר יהוה, אל־שמואל, שמע בקול העם, לכול אשר־יאמרו אליך: כי לא אותך מאסו, כי־אותי מאסו ממלוך עליהם. ח ככל־המעשים אשר־עשו, מיום העלותי אותם ממצריים ועד־היום הזה, ויעזבוני, ויעבדו אלוהים אחרים--כן המה עושים, גם־לך. ט ועתה, שמע בקולם: אך, כי־העד תעיד בהם, והגדת להם, משפט המלך אשר ימלוך עליהם. {ס}

י ויאמר שמואל, את כל־דברי יהוה, אל־העם, השואלים מאיתו מלך. {ס}

יא ויאמר--זה יהיה משפט המלך, אשר ימלוך עליכם: את־בניכם ייקח, ושם לו במרכבתו ובפרשיו, ורצו, לפני מרכבתו. יב ולשום לו, שרי אלפים ושרי חמישים; ולחרוש חרישו ולקצור קצירו, ולעשות כלי־מלחמתו וכלי רכבו. יג ואת־בנותיכם, ייקח, לרקחות ולטבחות, ולאופות. יד ואת־שדותיכם ואת־כרמיכם וזיתיכם, הטובים--ייקח; ונתן, לעבדיו. טו וזרעיכם וכרמיכם, יעשור; ונתן לסריסיו, ולעבדיו. טז ואת־עבדיכם ואת־שפחותיכם ואת־בחוריכם הטובים, ואת־חמוריכם--ייקח; ועשה, למלאכתו. יז צאנכם, יעשור; ואתם, תהיו־לו לעבדים. יח וזעקתם, ביום ההוא, מלפני מלככם, אשר בחרתם לכם; ולא־יענה יהוה אתכם, ביום ההוא. יט וימאנו העם, לשמוע בקול שמואל; ויאמרו לא, כי אם־מלך יהיה עלינו. כ והיינו גם־אנחנו, ככל־הגויים; ושפטנו מלכנו ויצא לפנינו, ונלחם את־מלחמותינו. כא וישמע שמואל, את כל־דברי העם; וידברם, באוזני יהוה. {פ}

כב ויאמר יהוה אל־שמואל שמע בקולם, והמלכת להם מלך; ויאמר שמואל אל־אנשי ישראל, לכו איש לעירו. {פ}