תנ"ך מנוקד

תנ"ך - ירמיהו - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב מג מד מה מו מז מח מט נ נא נב

ירמיהו פרק לט

א בשנה התשיעית לצדקייהו מלך־יהודה בחודש העשירי, בא נבוכדראצר מלך־בבל וכל־חילו אל־ירושלים, ויצורו, עליה. ב בעשתי־עשרה שנה לצדקייהו, בחודש הרביעי בתשעה לחודש, הובקעה, העיר. ג ויבואו, כול שרי מלך־בבל, ויישבו, בשער התווך--נרגל שראצר סמגר־נבו שר־סכים רב־סריס, נרגל שראצר רב־מג, וכל־שארית, שרי מלך בבל. ד ויהי כאשר ראם צדקייהו מלך־יהודה וכול אנשי המלחמה, ויברחו וייצאו לילה מן־העיר דרך גן המלך, בשער, בין החומותיים; וייצא, דרך הערבה. ה וירדפו חיל־כשדים אחריהם, וישיגו את־צדקייהו בערבות ירחו, ויקחו אותו ויעלוהו אל־נבוכדראצר מלך־בבל רבלתה, בארץ חמת; וידבר איתו, משפטים. ו וישחט מלך בבל את־בני צדקייהו, ברבלה--לעיניו; ואת כל־חורי יהודה, שחט מלך בבל. ז ואת־עיני צדקייהו, עיוור; ויאסרהו, בנחושתיים, לביא אותו, בבלה. ח ואת־בית המלך ואת־בית העם, שרפו הכשדים באש; ואת־חומות ירושלים, נתצו. ט ואת יתר העם הנשארים בעיר, ואת־הנופלים אשר נפלו עליו, ואת יתר העם, הנשארים--הגלה נבוזראדן רב־טבחים, בבל. י ומן־העם הדלים, אשר אין־להם מאומה, השאיר נבוזראדן רב־טבחים, בארץ יהודה; וייתן להם כרמים ויגבים, ביום ההוא. יא ויצו נבוכדראצר מלך־בבל, על־ירמיהו, ביד נבוזראדן רב־טבחים, לאמור. יב קחנו, ועיניך שים עליו, ואל־תעש לו, מאומה רע: כי, כאשר ידבר אליך--כן, עשה עימו. יג וישלח נבוזראדן רב־טבחים, ונבושזבן רב־סריס, ונרגל שראצר, רב־מג--וכול, רבי מלך־בבל. יד וישלחו ויקחו את־ירמיהו מחצר המטרה, וייתנו אותו אל־גדליהו בן־אחיקם בן־שפן, להוציאהו, אל־הבית; ויישב, בתוך העם. {ס}

טו ואל־ירמיהו, היה דבר־יהוה, בהיותו עצור, בחצר המטרה לאמור. טז הלוך ואמרת לעבד־מלך הכושי לאמור, כה־אמר יהוה צבאות אלוהי ישראל, הנני מביא את־דבריי אל־העיר הזאת לרעה, ולא לטובה; והיו לפניך, ביום ההוא. יז והצלתיך ביום־ההוא, נאום־יהוה; ולא תינתן ביד האנשים, אשר־אתה יגור מפניהם. יח כי מלט אמלטך, ובחרב לא תיפול; והייתה לך נפשך לשלל, כי־בטחת בי נאום־יהוה. {פ}