תנ"ך מנוקד

תנ"ך - יחזקאל - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב מג מד מה מו מז מח

יחזקאל פרק מו

א כה-אמר, אדוניי יהוה, שער החצר הפנימית הפונה קדים, יהיה סגור ששת ימי המעשה; וביום השבת ייפתח, וביום החודש ייפתח. ב ובא הנשיא דרך אולם השער מחוץ, ועמד על-מזוזת השער, ועשו הכוהנים את-עולתו ואת-שלמיו, והשתחווה על-מפתן השער ויצא; והשער לא-ייסגר, עד-הערב. ג והשתחוו עם-הארץ, פתח השער ההוא, בשבתות, ובחודשים--לפני, יהוה. ד והעולה, אשר-יקרב הנשיא ליהוה: ביום השבת, שישה כבשים תמימים--ואיל תמים. ה ומנחה איפה לאיל, ולכבשים מנחה מתת ידו; ושמן, הין לאיפה. {ס}

ו וביום החודש, פר בן-בקר תמימים; וששת כבשים ואיל, תמימים יהיו. ז ואיפה לפר ואיפה לאיל, יעשה מנחה, ולכבשים, כאשר תשיג ידו; ושמן, הין לאיפה. ח ובבוא, הנשיא--דרך אולם השער יבוא, ובדרכו ייצא. ט ובבוא עם-הארץ לפני יהוה, במועדים, הבא דרך-שער צפון להשתחוות ייצא דרך-שער נגב, והבא דרך-שער נגב ייצא דרך-שער צפונה: לא ישוב, דרך השער אשר-בא בו--כי נכחו, ייצא. י והנשיא--בתוכם בבואם יבוא, ובצאתם ייצאו. יא ובחגים ובמועדים, תהיה המנחה איפה לפר ואיפה לאיל, ולכבשים, מתת ידו; ושמן, הין לאיפה. {פ}

יב וכי-יעשה הנשיא נדבה עולה או-שלמים, נדבה ליהוה, ופתח לו את-השער הפונה קדים, ועשה את-עולתו ואת-שלמיו כאשר יעשה ביום השבת; ויצא וסגר את-השער, אחרי צאתו. יג וכבש בן-שנתו תמים, תעשה עולה ליום--ליהוה: בבוקר בבוקר, תעשה אותו. יד ומנחה תעשה עליו בבוקר בבוקר, שישית האיפה, ושמן שלישית ההין, לרוס את-הסולת: מנחה, ליהוה--חוקות עולם, תמיד. טו יעשו את-הכבש ואת-המנחה ואת-השמן, בבוקר בבוקר: עולת, תמיד. {ס}

טז כה-אמר אדוניי יהוה, כי-ייתן הנשיא מתנה לאיש מבניו--נחלתו היא, לבניו תהיה: אחוזתם היא, בנחלה. {ס}

יז וכי-ייתן מתנה מנחלתו, לאחד מעבדיו--והייתה לו עד-שנת הדרור, ושבת לנשיא; אך, נחלתו--בניו, להם תהיה. יח ולא-ייקח הנשיא מנחלת העם, להונותם מאחוזתם--מאחוזתו, ינחיל את-בניו: למען אשר לא-יפוצו עמי, איש מאחוזתו. יט ויביאני במבוא, אשר על-כתף השער, אל-הלשכות הקודש אל-הכוהנים, הפונות צפונה; והנה-שם מקום, בירכתיים ימה. כ ויאמר אליי--זה המקום אשר יבשלו-שם הכוהנים, את-האשם ואת-החטאת: אשר יאפו את-המנחה, לבלתי הוציא אל-החצר החיצונה לקדש את-העם. כא ויוציאני, אל-החצר החיצונה, ויעבירני, אל-ארבעת מקצועי החצר; והנה חצר במקצוע החצר, חצר במקצוע החצר. כב בארבעת מקצועות החצר, חצרות קטורות--ארבעים אורך, ושלושים רוחב: מידה אחת, לארבעתם מהוקצעות. כג וטור סביב בהם סביב, לארבעתם; ומבשלות עשוי, מתחת הטירות סביב. כד ויאמר, אליי: אלה בית המבשלים, אשר יבשלו-שם משרתי הבית את-זבח העם.