תנ"ך מנוקד
 
תנ"ך - איוב - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב

איוב פרק לד

א                  ויען אליהוא, ויאמר.
ב  שמעו חכמים מיליי;    ויודעים, האזינו לי.
ג  כי־אוזן, מילין תבחן;    וחיך, יטעם לאכול.
ד  משפט נבחרה־לנו;    נדעה בינינו מה־טוב.
ה  כי־אמר איוב צדקתי;    ואל, הסיר משפטי.
ו  על־משפטי אכזב;    אנוש חיצי בלי־פשע.
ז  מי־גבר כאיוב;    ישתה־לעג כמים.
ח  וארח לחברה, עם־פועלי אוון;    וללכת, עם־אנשי־רשע.
ט  כי־אמר, לא יסכון־גבר--    ברצותו, עם־אלוהים.
י  לכן, אנשי לבב--    שמעו־לי:
חלילה לאל מרשע;    ושדיי מעוול.
יא  כי פועל אדם, ישלם־לו;    וכאורח איש, ימציאנו.
יב  אף־אומנם, אל לא־ירשיע;    ושדיי, לא־יעוות משפט.
יג  מי־פקד עליו ארצה;    ומי שם, תבל כולה.
יד  אם־ישים אליו ליבו;    רוחו ונשמתו, אליו יאסוף.
טו  יגווע כל־בשר יחד;    ואדם, על־עפר ישוב.
טז  ואם־בינה, שמעה־זאת;    האזינה, לקול מיליי.
יז  האף שונא משפט יחבוש;    ואם־צדיק כביר תרשיע.
יח  האמור למלך בלייעל--    רשע, אל־נדיבים.
יט  אשר לא־נשא, פני שרים,    ולא ניכר־שוע, לפני־דל:
כי־מעשה ידיו    כולם.
כ  רגע, ימותו--    וחצות לילה:
יגועשו עם ויעבורו;    ויסירו אביר, לא ביד.
כא  כי־עיניו, על־דרכי־איש;    וכל־צעדיו יראה.
כב  אין־חושך, ואין צלמוות--    להיסתר שם, פועלי אוון.
כג  כי לא על־איש, ישים עוד--    להלוך אל־אל, במשפט.
כד  ירוע כבירים לא־חקר;    ויעמד אחרים תחתם.
כה  לכן--יכיר, מעבדיהם;    והפך לילה, ויידכאו.
כו  תחת־רשעים ספקם--    במקום רואים.
כז  אשר על־כן, סרו מאחריו;    וכל־דרכיו, לא השכילו.
כח  להביא עליו, צעקת־דל;    וצעקת עניים ישמע.
כט  והוא ישקיט, ומי ירשיע--    ויסתר פנים, ומי ישורנו;
ועל־גוי ועל־אדם    יחד.
ל  ממלוך, אדם חנף--    ממוקשי עם.
לא  כי־אל־אל, האמר נשאתי--    לא אחבול.
לב  בלעדי אחזה, אתה הורני;    אם־עוול פעלתי, לא אוסיף.
לג  המעימך ישלמנה, כי־מאסת--כי־אתה תבחר ולא־אני;    ומה־ידעת דבר.
לד  אנשי לבב, יאמרו לי;    וגבר חכם, שומע לי.
לה  איוב, לא־בדעת ידבר;    ודבריו, לא בהשכל.
לו  אבי--ייבחן איוב עד־נצח:    על־תשובות, באנשי־אוון.
לז  כי יוסיף על־חטאתו פשע, בינינו ישפוק;    וירב אמריו לאל.

תנ"ך מנוקד
 
תנ"ך - איוב - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב