תנ"ך מנוקד
 
תנ"ך - איוב - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב

איוב פרק לב

א  וישבתו, שלושת האנשים האלה--    מענות את-איוב:
כי הוא צדיק    בעיניו.

ב  וייחר אף, אליהוא בן-ברכאל הבוזי--    ממשפחת-רם:
באיוב, חרה אפו--    על-צדקו נפשו, מאלוהים.
ג  ובשלושת ריעיו,    חרה אפו:
על אשר לא-מצאו מענה--    וירשיעו, את-איוב.
ד  ואליהוא--חיכה את-איוב, בדברים:    כי זקנים-המה ממנו לימים.
ה  וירא אליהוא--כי אין מענה, בפי שלושת האנשים;    וייחר אפו.

ו  ויען, אליהוא בן-ברכאל הבוזי--    ויאמר:
צעיר אני לימים,    ואתם ישישים;
על-כן זחלתי ואירא,    מחוות דעי אתכם.
ז  אמרתי, ימים ידברו;    ורוב שנים, יודיעו חכמה.
ח  אכן, רוח-היא באנוש;    ונשמת שדיי תבינם.
ט  לא-רבים יחכמו;    וזקנים, יבינו משפט.
י  לכן אמרתי, שמעה-לי;    אחווה דעי אף-אני.
יא  הן הוחלתי, לדבריכם--אזין, עד-תבונותיכם:    עד-תחקרון מילין.
יב  ועדיכם, אתבונן:    והנה אין לאיוב מוכיח--עונה אמריו מכם.
יג  פן-תאמרו, מצאנו חכמה;    אל יידפנו לא-איש.
יד  ולא-ערך אליי מילין;    ובאמריכם, לא אשיבנו.
טו  חתו, לא-ענו עוד;    העתיקו מהם מילים.
טז  והוחלתי, כי-לא ידברו:    כי עמדו, לא-ענו עוד.
יז  אענה אף-אני חלקי;    אחווה דעי אף-אני.
יח  כי, מלאתי מילים;    הציקתני, רוח בטני.
יט  הנה-בטני--כיין לא-ייפתח;    כאובות חדשים, ייבקע.
כ  אדברה וירווח-לי;    אפתח שפתיי ואענה.
כא  אל-נא, אשא פני-איש;    ואל-אדם, לא אכנה.
כב  כי לא ידעתי אכנה;    כמעט, יישאני עושני.

תנ"ך מנוקד
 
תנ"ך - איוב - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ מא מב