תנ"ך מנוקד

תנ"ך - דברי הימים - הכול
דברי הימים א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט - דברי הימים ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו

דברי הימים א פרק כג

א ודויד זקן, ושבע ימים; וימלך את-שלמה בנו, על-ישראל. ב ויאסוף את-כל-שרי ישראל, והכוהנים והלויים. ג וייספרו, הלויים, מבן שלושים שנה, ומעלה; ויהי מספרם לגולגלותם לגברים, שלושים ושמונה אלף. ד מאלה, לנצח על-מלאכת בית-יהוה, עשרים וארבעה, אלף; ושוטרים ושופטים, ששת אלפים. ה וארבעת אלפים, שוערים; וארבעת אלפים, מהללים ליהוה, בכלים, אשר עשיתי להלל. {ס} ו ויחלקם דויד, מחלקות; {ס} לבני לוי, לגרשון קהת ומררי. {ס} ז לגרשוני, לעדן ושמעי. {ס} ח בני לעדן, הראש יחיאל וזיתם ויואל--שלושה. {ס} ט בני שמעי, שלומית וחזיאל והרן--שלושה; אלה ראשי האבות, ללעדן. {ס} י ובני שמעי--יחת זינא, ויעוש ובריעה; אלה בני-שמעי, ארבעה. יא ויהי-יחת הראש, וזיזה השני; ויעוש ובריעה, לא-הרבו בנים, ויהיו לבית אב, לפקודה אחת. {ס} יב בני קהת, עמרם יצהר חברון ועוזיאל--ארבעה. {ס} יג בני עמרם, אהרון ומשה; וייבדל אהרון להקדישו קודש קודשים הוא-ובניו, עד-עולם--להקטיר לפני יהוה לשרתו ולברך בשמו, עד-עולם. יד ומשה, איש האלוהים--בניו, ייקראו על-שבט הלוי. {ס} טו בני משה, גרשום ואליעזר. טז בני גרשום, שבואל הראש. יז ויהיו בני-אליעזר, רחביה הראש; ולא-היה לאליעזר בנים אחרים, ובני רחביה רבו למעלה. {ס} יח בני יצהר, שלומית הראש. יט בני, חברון--ירייהו הראש, אמריה השני, יחזיאל השלישי, ויקמעם הרביעי. כ בני, עוזיאל--מיכה הראש, ויישייה השני. כא בני מררי מחלי ומושי, בני מחלי אלעזר וקיש. כב וימת, אלעזר, ולא-היו לו בנים, כי אם-בנות; ויישאום בני-קיש, אחיהם. כג בני מושי, מחלי ועדר וירמות--שלושה. {ס} כד אלה בני-לוי לבית אבותיהם ראשי האבות לפקודיהם, במספר שמות לגולגלותם, עושי המלאכה, לעבודת בית יהוה--מבן עשרים שנה, ומעלה. כה כי אמר דויד, הניח יהוה אלוהי-ישראל לעמו; וישכון בירושלים, עד-לעולם. כו וגם, ללויים--אין-לשאת את-המשכן ואת-כל-כליו, לעבודתו. כז כי בדברי דויד האחרונים, המה מספר בני-לוי, מבן עשרים שנה, ולמעלה. כח כי מעמדם ליד-בני אהרון, לעבודת בית יהוה, על-החצרות ועל-הלשכות, ועל-טוהרת לכל-קודש--ומעשה, עבודת בית האלוהים. כט וללחם המערכת ולסולת למנחה, ולרקיקי המצות, ולמחבת, ולמורבכת; ולכל-משורה, ומידה. ל ולעמוד בבוקר בבוקר, להודות ולהלל ליהוה; וכן, לערב. לא ולכול העלות עולות, ליהוה, לשבתות, לחודשים ולמועדים--במספר כמשפט עליהם תמיד, לפני יהוה. לב ושמרו את-משמרת אוהל-מועד, ואת משמרת הקודש, ומשמרת, בני אהרון אחיהם--לעבודת, בית יהוה. {פ}