תנ"ך מנוקד

תנ"ך - דברי הימים - הכול
דברי הימים א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט - דברי הימים ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו

דברי הימים א פרק י

א ופלשתים, נלחמו בישראל; וינס איש-ישראל מפני פלשתים, וייפלו חללים בהר גלבוע. ב וידבקו פלשתים, אחרי שאול ואחרי בניו; ויכו פלשתים, את-יונתן ואת-אבינדב ואת-מלכישוע--בני שאול. ג ותכבד המלחמה על-שאול, וימצאוהו המורים בקשת; ויחל, מן-היורים. ד ויאמר שאול אל-נושא כליו שלוף חרבך ודוקרני בה, פן-יבואו הערלים האלה והתעללו-בי, ולא אבה נושא כליו, כי ירא מאוד; {ס} וייקח שאול את-החרב, וייפול עליה. ה וירא נושא-כליו, כי מת שאול; וייפול גם-הוא על-החרב, וימות. {ס} ו וימת שאול ושלושת בניו, וכל-ביתו יחדיו מתו. ז ויראו כל-איש ישראל אשר-בעמק, כי נסו, וכי-מתו, שאול ובניו; ויעזבו עריהם, וינוסו, ויבואו פלשתים, ויישבו בהם. {ס} ח ויהי, ממוחרת, ויבואו פלשתים, לפשט את-החללים; וימצאו את-שאול ואת-בניו, נופלים בהר גלבוע. ט ויפשיטוהו--וישאו את-ראשו, ואת-כליו; וישלחו בארץ-פלשתים סביב, לבשר את-עצביהם--ואת-העם. י וישימו, את-כליו, בית, אלוהיהם; ואת-גולגולתו תקעו, בית דגון. {ס} יא וישמעו, כול יבש גלעד, את כל-אשר-עשו פלשתים, לשאול. יב ויקומו, כל-איש חיל, וישאו את-גופת שאול ואת גופות בניו, ויביאום יבשה; ויקברו את-עצמותיהם תחת האלה, ביבש, ויצומו, שבעת ימים. יג וימת שאול, במעלו אשר מעל ביהוה, על-דבר יהוה, אשר לא-שמר; וגם-לשאול באוב, לדרוש. יד ולא-דרש ביהוה, וימיתהו; ויסב, את-המלוכה, לדויד, בן-ישי. {פ}