תנ"ך מנוקד

תנ"ך - דברי הימים - הכול
דברי הימים א פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט - דברי הימים ב פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו

דברי הימים א פרק כב

א ויאמר דויד--זה הוא, בית יהוה האלוהים; וזה־מזבח לעולה, לישראל. {פ}

ב ויאמר דויד--לכנוס את־הגרים, אשר בארץ ישראל; ויעמד חוצבים, לחצוב אבני גזית, לבנות, בית האלוהים. ג וברזל לרוב למסמרים לדלתות השערים, ולמחברות--הכין דויד; ונחושת לרוב, אין משקל. ד ועצי ארזים, לאין מספר: כי־הביאו הצידונים והצורים עצי ארזים, לרוב--לדויד. {פ}

ה ויאמר דויד, שלמה בני נער ורך, והבית לבנות ליהוה להגדיל למעלה לשם ולתפארת לכל־הארצות, אכינה נא לו; ויכן דויד לרוב, לפני מותו. ו ויקרא, לשלמה בנו; ויצווהו לבנות בית, ליהוה אלוהי ישראל. {ס} ז ויאמר דויד, לשלמה: בני--אני היה עם־לבבי, לבנות בית לשם יהוה אלוהיי. ח ויהי עליי דבר־יהוה, לאמור, דם לרוב שפכת, ומלחמות גדולות עשית: לא־תבנה בית, לשמי--כי דמים רבים, שפכת ארצה לפניי. ט הנה־בן נולד לך, הוא יהיה איש מנוחה, והניחותי לו מכל־אויביו, מסביב: כי שלמה יהיה שמו, ושלום ושקט אתן על־ישראל בימיו. י הוא־יבנה בית, לשמי, והוא יהיה־לי לבן, ואני־לו לאב; והכינותי כיסא מלכותו, על־ישראל--עד־עולם. יא עתה בני, יהי יהוה עימך; והצלחת, ובנית בית יהוה אלוהיך, כאשר, דיבר עליך. יב אך ייתן־לך יהוה שכל ובינה, ויצווך על־ישראל, ולשמור, את־תורת יהוה אלוהיך. יג אז תצליח--אם־תשמור לעשות את־החוקים ואת־המשפטים, אשר ציווה יהוה את־משה על־ישראל; חזק ואמץ, אל־תירא ואל־תיחת. יד והנה בעוניי הכינותי לבית־יהוה, זהב כיכרים מאה־אלף וכסף אלף אלפים כיכרים, ולנחושת ולברזל אין משקל, כי לרוב היה; ועצים ואבנים הכינותי, ועליהם תוסיף. טו ועימך לרוב, עושי מלאכה--חוצבים, וחרשי אבן ועץ; וכל־חכם, בכל־מלאכה. טז לזהב לכסף ולנחושת ולברזל, אין מספר; קום ועשה, ויהי יהוה עימך. יז ויצו דויד לכל־שרי ישראל, לעזור לשלמה בנו. {ס} יח הלוא יהוה אלוהיכם עימכם, והניח לכם מסביב: כי נתן בידי, את יושבי הארץ, ונכבשה הארץ לפני יהוה, ולפני עמו. יט עתה, תנו לבבכם ונפשכם, לדרוש, ליהוה אלוהיכם; וקומו, ובנו את־מקדש יהוה האלוהים, להביא את־ארון ברית־יהוה וכלי קודש האלוהים, לבית הנבנה לשם־יהוה. {פ}