תנ"ך מנוקד

תנ"ך - דברים - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד

דברים פרק ל

א והיה כי־יבואו עליך כל־הדברים האלה, הברכה והקללה, אשר נתתי, לפניך; והשבות, אל־לבבך, בכל־הגויים, אשר הדיחך יהוה אלוהיך שמה. ב ושבת עד־יהוה אלוהיך, ושמעת בקולו, ככול אשר־אנוכי מצווך, היום: אתה ובניך, בכל־לבבך ובכל־נפשך. ג ושב יהוה אלוהיך את־שבותך, וריחמך; ושב, וקיבצך מכל־העמים, אשר הפיצך יהוה אלוהיך, שמה. ד אם־יהיה נידחך, בקצה השמיים--משם, יקבצך יהוה אלוהיך, ומשם, ייקחך. ה והביאך יהוה אלוהיך, אל־הארץ אשר־ירשו אבותיך--וירשתה; והיטיבך והרבך, מאבותיך. ו ומל יהוה אלוהיך את־לבבך, ואת־לבב זרעך: לאהבה את־יהוה אלוהיך, בכל־לבבך ובכל־נפשך--למען חייך. ז ונתן יהוה אלוהיך, את כל־האלות האלה, על־אויביך ועל־שונאיך, אשר רדפוך. ח ואתה תשוב, ושמעת בקול יהוה; ועשית, את־כל־מצוותיו, אשר אנוכי מצווך, היום. ט והותירך יהוה אלוהיך בכול מעשה ידך, בפרי בטנך ובפרי בהמתך ובפרי אדמתך--לטובה: כי ישוב יהוה, לשוש עליך לטוב, כאשר־שש, על־אבותיך. י כי תשמע, בקול יהוה אלוהיך, לשמור מצוותיו וחוקותיו, הכתובה בספר התורה הזה: כי תשוב אל־יהוה אלוהיך, בכל־לבבך ובכל־נפשך. {ס}

יא כי המצוה הזאת, אשר אנוכי מצווך היום--לא־נפלאת היא ממך, ולא רחוקה היא. יב לא בשמיים, היא: לאמור, מי יעלה־לנו השמיימה וייקחהא לנו, וישמיענו אותה, ונעשנה. יג ולא־מעבר לים, היא: לאמור, מי יעבור־לנו אל־עבר הים וייקחהא לנו, וישמיענו אותה, ונעשנה. יד כי־קרוב אליך הדבר, מאוד: בפיך ובלבבך, לעשותו. {ס}

טו ראה נתתי לפניך היום, את־החיים ואת־הטוב, ואת־המוות, ואת־הרע. טז אשר אנוכי מצווך, היום, לאהבה את־יהוה אלוהיך ללכת בדרכיו, ולשמור מצוותיו וחוקותיו ומשפטיו; וחיית ורבית--ובירכך יהוה אלוהיך, בארץ אשר־אתה בא־שמה לרשתה. יז ואם־יפנה לבבך, ולא תשמע; ונידחת, והשתחווית לאלוהים אחרים--ועבדתם. יח הגדתי לכם היום, כי אבוד תאבדון: לא־תאריכון ימים, על־האדמה, אשר אתה עובר את־הירדן, לבוא שמה לרשתה. יט העידותי בכם היום, את־השמיים ואת־הארץ--החיים והמוות נתתי לפניך, הברכה והקללה; ובחרת, בחיים--למען תחיה, אתה וזרעך. כ לאהבה את־יהוה אלוהיך, לשמוע בקולו ולדובקה־בו: כי הוא חייך, ואורך ימיך--לשבת על־האדמה אשר נשבע יהוה לאבותיך לאברהם ליצחק וליעקוב, לתת להם. {פ}