תנ"ך מנוקד

תנ"ך - שמות - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ

שמות פרק מ

א וידבר יהוה, אל-משה לאמור. ב ביום-החודש הראשון, באחד לחודש, תקים, את-משכן אוהל מועד. ג ושמת שם, את ארון העדות; וסכות על-הארון, את-הפרוכת. ד והבאת, את-השולחן, וערכת, את-ערכו; והבאת, את-המנורה, והעלית, את-נרותיה. ה ונתת את-מזבח הזהב, לקטורת, לפני, ארון העדות; ושמת את-מסך הפתח, למשכן. ו ונתת, את מזבח העולה, לפני, פתח משכן אוהל-מועד. ז ונתת, את-הכיור, בין-אוהל מועד, ובין המזבח; ונתת שם, מים. ח ושמת את-החצר, סביב; ונתת, את-מסך שער החצר. ט ולקחת את-שמן המשחה, ומשחת את-המשכן ואת-כל-אשר-בו; וקידשת אותו ואת-כל-כליו, והיה קודש. י ומשחת את-מזבח העולה, ואת-כל-כליו; וקידשת, את-המזבח, והיה המזבח, קודש קודשים. יא ומשחת את-הכיור, ואת-כנו; וקידשת, אותו. יב והקרבת את-אהרון ואת-בניו, אל-פתח אוהל מועד; ורחצת אותם, במים. יג והלבשת, את-אהרון, את, בגדי הקודש; ומשחת אותו וקידשת אותו, וכיהן לי. יד ואת-בניו, תקריב; והלבשת אותם, כותונות. טו ומשחת אותם, כאשר משחת את-אביהם, וכיהנו, לי; והייתה להיות להם מושחתם, לכהונת עולם--לדורותם. טז ויעש, משה: ככול אשר ציווה יהוה, אותו--כן עשה. {ס}

יז ויהי בחודש הראשון, בשנה השנית--באחד לחודש: הוקם, המשכן. יח ויקם משה את-המשכן, וייתן את-אדניו, וישם את-קרשיו, וייתן את-בריחיו; ויקם, את-עמודיו. יט ויפרוש את-האוהל, על-המשכן, וישם את-מכסה האוהל עליו, מלמעלה--כאשר ציווה יהוה, את-משה. {ס}

כ וייקח וייתן את-העדות, אל-הארון, וישם את-הבדים, על-הארון; וייתן את-הכפורת על-הארון, מלמעלה. כא ויבא את-הארון, אל-המשכן, וישם את פרוכת המסך, ויסך על ארון העדות--כאשר ציווה יהוה, את-משה. {ס}

כב וייתן את-השולחן באוהל מועד, על ירך המשכן צפונה, מחוץ, לפרוכת. כג ויערוך עליו ערך לחם, לפני יהוה--כאשר ציווה יהוה, את-משה. {ס}

כד וישם את-המנורה באוהל מועד, נוכח השולחן, על ירך המשכן, נגבה. כה ויעל הנרות, לפני יהוה--כאשר ציווה יהוה, את-משה. {ס}

כו וישם את-מזבח הזהב, באוהל מועד, לפני, הפרוכת. כז ויקטר עליו, קטורת סמים--כאשר ציווה יהוה, את-משה. {ס}

כח וישם את-מסך הפתח, למשכן. כט ואת, מזבח העולה, שם, פתח משכן אוהל-מועד; ויעל עליו, את-העולה ואת-המנחה--כאשר ציווה יהוה, את-משה. {ס}

ל וישם, את-הכיור, בין-אוהל מועד, ובין המזבח; וייתן שמה מים, לרוחצה. לא ורחצו ממנו, משה ואהרון ובניו, את-ידיהם, ואת-רגליהם. לב בבואם אל-אוהל מועד, ובקורבתם אל-המזבח--ירחצו: כאשר ציווה יהוה, את-משה. {ס}

לג ויקם את-החצר, סביב למשכן ולמזבח, וייתן, את-מסך שער החצר; ויכל משה, את-המלאכה. {פ}

לד ויכס הענן, את-אוהל מועד; וכבוד יהוה, מלא את-המשכן. לה ולא-יכול משה, לבוא אל-אוהל מועד--כי-שכן עליו, הענן; וכבוד יהוה, מלא את-המשכן. לו ובהיעלות הענן מעל המשכן, יסעו בני ישראל, בכול, מסעיהם. לז ואם-לא ייעלה, הענן--ולא יסעו, עד-יום היעלותו. לח כי ענן יהוה על-המשכן, יומם, ואש, תהיה לילה בו--לעיני כל-בית-ישראל, בכל-מסעיהם. {ש}