תנ"ך מנוקד
 
תנ"ך - שמות - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ

שמות פרק לא

א וידבר יהוה, אל־משה לאמור.  ב ראה, קראתי בשם, בצלאל בן־אורי בן־חור, למטה יהודה.  ג ואמלא אותו, רוח אלוהים, בחכמה ובתבונה ובדעת, ובכל־מלאכה.  ד לחשוב, מחשבות; לעשות בזהב ובכסף, ובנחושת.  ה ובחרושת אבן למלאות, ובחרושת עץ; לעשות, בכל־מלאכה.  ו ואני הנה נתתי איתו, את אוהליאב בן־אחיסמך למטה־דן, ובלב כל־חכם־לב, נתתי חכמה; ועשו, את כל־אשר ציוויתיך.  ז את אוהל מועד, ואת־הארון לעדות, ואת־הכפורת, אשר עליו; ואת, כל־כלי האוהל.  ח ואת־השולחן, ואת־כליו, ואת־המנורה הטהורה, ואת־כל־כליה; ואת, מזבח הקטורת.  ט ואת־מזבח העולה, ואת־כל־כליו; ואת־הכיור, ואת־כנו.  י ואת, בגדי השרד; ואת־בגדי הקודש לאהרון הכוהן, ואת־בגדי בניו לכהן.  יא ואת שמן המשחה ואת־קטורת הסמים, לקודש:  ככול אשר־ציוויתיך, יעשו.  {פ}

יב ויאמר יהוה, אל־משה לאמור.  יג ואתה דבר אל־בני ישראל, לאמור, אך את־שבתותיי, תשמורו:  כי אות היא ביני וביניכם, לדורותיכם--לדעת, כי אני יהוה מקדשכם.  יד ושמרתם, את־השבת, כי קודש היא, לכם; מחלליה, מות יומת--כי כל־העושה בה מלאכה, ונכרתה הנפש ההיא מקרב עמיה.  טו ששת ימים, ייעשה מלאכה, וביום השביעי שבת שבתון קודש, ליהוה; כל־העושה מלאכה ביום השבת, מות יומת.  טז ושמרו בני־ישראל, את־השבת, לעשות את־השבת לדורותם, ברית עולם.  יז ביני, ובין בני ישראל--אות היא, לעולם:  כי־ששת ימים, עשה יהוה את־השמיים ואת־הארץ, וביום השביעי, שבת ויינפש.  {ס}

יח וייתן אל־משה, ככלותו לדבר איתו בהר סיניי, שני, לוחות העדות--לוחות אבן, כתובים באצבע אלוהים.

תנ"ך מנוקד
 
תנ"ך - שמות - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא לב לג לד לה לו לז לח לט מ