☰

תנ"ך מנוקד
 
תנ"ך - משלי - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא

משלי פרק ג

א  בני, תורתי אל־תשכח;    ומצוותיי, ייצור ליבך.
ב  כי אורך ימים, ושנות חיים--    ושלום, יוסיפו לך.
ג  חסד ואמת,    אל־יעזבוך:
קושרם על־גרגרותיך;    כותבם, על־לוח ליבך.
ד  ומצא־חן ושכל־טוב--    בעיני אלוהים ואדם.
ה  בטח אל־יהוה, בכל־ליבך;    ואל־בינתך, אל־תישען.
ו  בכל־דרכיך דעהו;    והוא, יישר אורחותיך.
ז  אל־תהי חכם בעיניך;    ירא את־יהוה, וסור מרע.
ח  רפאות, תהי לשורך;    ושיקוי, לעצמותיך.
ט  כבד את־יהוה, מהונך;    ומראשית, כל־תבואתך.
י  ויימלאו אסמיך שבע;    ותירוש, יקביך יפרוצו.
יא  מוסר יהוה, בני אל־תמאס;    ואל־תקוץ, בתוכחתו.
יב  כי את אשר יאהב יהוה    יוכיח;
וכאב,    את־בן ירצה.
יג  אשרי אדם, מצא חכמה;    ואדם, יפיק תבונה.
יד  כי טוב סחרה, מסחר־כסף;    ומחרוץ, תבואתה.
טו  יקרה היא, מפנינים;    וכל־חפציך, לא ישוו־בה.
טז  אורך ימים, בימינה;    בשמאלה, עושר וכבוד.
יז  דרכיה דרכי־נועם;    וכל־נתיבותיה שלום.
יח  עץ־חיים היא, למחזיקים בה;    ותומכיה מאושר.

יט  יהוה--בחכמה יסד־ארץ;    כונן שמיים, בתבונה.
כ  בדעתו, תהומות נבקעו;    ושחקים, ירעפו־טל.
כא  בני, אל־ילוזו מעיניך;    נצור תושייה, ומזימה.
כב  ויהיו חיים לנפשך;    וחן, לגרגרותיך.
כג  אז תלך לבטח דרכך;    ורגלך, לא תיגוף.
כד  אם־תשכב לא־תפחד;    ושכבת, וערבה שנתך.
כה  אל־תירא, מפחד פתאום;    ומשואת רשעים, כי תבוא.
כו  כי־יהוה, יהיה בכסלך;    ושמר רגלך מלכד.
כז  אל־תמנע־טוב מבעליו--    בהיות לאל ידך לעשות.
כח  אל־תאמר לריעך, לך ושוב--ומחר אתן;    ויש איתך.
כט  אל־תחרוש על־ריעך רעה;    והוא־יושב לבטח איתך.
ל  אל־תריב עם־אדם חינם--    אם־לא גמלך רעה.
לא  אל־תקנא, באיש חמס;    ואל־תבחר, בכל־דרכיו.
לב  כי תועבת יהוה נלוז;    ואת־ישרים סודו.
לג  מארת יהוה, בבית רשע;    ונווה צדיקים יברך.
לד  אם־ללצים הוא־יליץ;    ולענווים, ייתן־חן.
לה  כבוד, חכמים ינחלו;    וכסילים, מרים קלון.

תנ"ך מנוקד
 
תנ"ך - משלי - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז כח כט ל לא