תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא

שופטים פרק ד

א ויוסיפו בני ישראל, לעשות הרע בעיני יהוה; ואהוד, מת.  ב וימכרם יהוה, ביד יבין מלך־כנען, אשר מלך, בחצור; ושר־צבאו, סיסרא, והוא יושב, בחרושת הגויים.  ג ויצעקו בני־ישראל, אל־יהוה:  כי תשע מאות רכב־ברזל, לו, והוא לחץ את־בני ישראל בחוזקה, עשרים שנה.  {פ}

ד ודבורה אישה נביאה, אשת לפידות--היא שופטה את־ישראל, בעת ההיא.  ה והיא יושבת תחת־תומר דבורה, בין הרמה ובין בית־אל--בהר אפריים; ויעלו אליה בני ישראל, למשפט.  ו ותשלח, ותקרא לברק בן־אבינועם, מקדש, נפתלי; ותאמר אליו הלוא ציווה יהוה אלוהי־ישראל, לך ומשכת בהר תבור, ולקחת עימך עשרת אלפים איש, מבני נפתלי ומבני זבולון.  ז ומשכתי אליך אל־נחל קישון, את־סיסרא שר־צבא יבין, ואת־רכבו, ואת־המונו; ונתתיהו, בידך.  ח ויאמר אליה ברק, אם־תלכי עימי והלכתי; ואם־לא תלכי עימי, לא אלך.  ט ותאמר הלוך אלך עימך, אפס כי לא תהיה תפארתך על־הדרך אשר אתה הולך--כי ביד־אישה, ימכור יהוה את־סיסרא; ותקם דבורה ותלך עם־ברק, קדשה.  י ויזעק ברק את־זבולון ואת־נפתלי, קדשה, ויעל ברגליו, עשרת אלפי איש; ותעל עימו, דבורה.  יא וחבר הקיני נפרד מקין, מבני חובב חותן משה; ויט אוהלו, עד־אילון בצעננים אשר את־קדש.  יב ויגידו, לסיסרא:  כי עלה ברק בן־אבינועם, הר־תבור.  יג ויזעק סיסרא את־כל־רכבו, תשע מאות רכב ברזל, ואת־כל־העם, אשר איתו--מחרושת הגויים, אל־נחל קישון.  יד ותאמר דבורה אל־ברק קום, כי זה היום אשר נתן יהוה את־סיסרא בידך--הלוא יהוה, יצא לפניך; ויירד ברק מהר תבור, ועשרת אלפים איש אחריו.  טו ויהם יהוה את־סיסרא ואת־כל־הרכב ואת־כל־המחנה, לפי־חרב--לפני ברק; ויירד סיסרא מעל המרכבה, וינס ברגליו.  טז וברק, רדף אחרי הרכב ואחרי המחנה, עד, חרושת הגויים; וייפול כל־מחנה סיסרא, לפי־חרב--לא נשאר, עד־אחד.  יז וסיסרא, נס ברגליו, אל־אוהל יעל, אשת חבר הקיני:  כי שלום, בין יבין מלך־חצור, ובין, בית חבר הקיני.  יח ותצא יעל, לקראת סיסרא, ותאמר אליו סורה אדוני סורה אליי, אל־תירא; ויסר אליה האוהלה, ותכסהו בשמיכה.  יט ויאמר אליה השקיני־נא מעט־מים, כי צמאתי; ותפתח את־נאד החלב, ותשקהו--ותכסהו.  כ ויאמר אליה, עמוד פתח האוהל; והיה אם־איש יבוא ושאלך, ואמר היש־פה איש--ואמרת אין.  כא ותיקח יעל אשת־חבר את־יתד האוהל ותשם את־המקבת בידה, ותבוא אליו בלאט, ותתקע את־היתד ברקתו, ותצנח בארץ; והוא־נרדם ויעף, וימות.  כב והנה ברק, רודף את־סיסרא, ותצא יעל לקראתו, ותאמר לו לך ואראך את־האיש אשר־אתה מבקש; ויבוא אליה--והנה סיסרא נופל מת, והיתד ברקתו.  כג ויכנע אלוהים ביום ההוא, את יבין מלך־כנען, לפני, בני ישראל.  כד ותלך יד בני־ישראל, הלוך וקשה, על, יבין מלך־כנען--עד אשר הכריתו, את יבין מלך־כנען.  {ש}

תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא