תנ"ך מנוקד
תנ"ך -
שופטים - הכול
פרק
א
ב
ג
ד
ה
ו
ז
ח
ט
י
יא
יב
יג
יד
טו
טז
יז
יח
יט
כ
כא
א ויעל מלאך-יהוה מן-הגלגל, אל-הבוכים; {פ}
ויאמר אעלה אתכם ממצריים, ואביא אתכם אל-הארץ אשר נשבעתי לאבותיכם, ואומר, לא-אפר בריתי איתכם לעולם.
ב ואתם, לא-תכרתו ברית ליושבי הארץ הזאת--מזבחותיהם, תיתוצון; ולא-שמעתם בקולי, מה-זאת עשיתם.
ג וגם אמרתי, לא-אגרש אותם מפניכם; והיו לכם, לצידים, ואלוהיהם, יהיו לכם למוקש.
ד ויהי, כדבר מלאך יהוה את-הדברים האלה, אל-כל-בני, ישראל; וישאו העם את-קולם, ויבכו.
ה ויקראו שם-המקום ההוא, בוכים; ויזבחו-שם, ליהוה. {פ}
ו וישלח יהושוע, את-העם; וילכו בני-ישראל איש לנחלתו, לרשת את-הארץ. ז ויעבדו העם את-יהוה, כול ימי יהושוע; וכול ימי הזקנים, אשר האריכו ימים אחרי יהושוע, אשר ראו את כל-מעשה יהוה הגדול, אשר עשה לישראל. ח וימת יהושוע בן-נון, עבד יהוה, בן-מאה ועשר, שנים. ט ויקברו אותו בגבול נחלתו, בתמנת-חרס בהר אפריים, מצפון, להר-געש. י וגם כל-הדור ההוא, נאספו אל-אבותיו; ויקם דור אחר אחריהם, אשר לא-ידעו את-יהוה, וגם את-המעשה, אשר עשה לישראל. {פ}
יא ויעשו בני-ישראל את-הרע, בעיני יהוה; ויעבדו, את-הבעלים. יב ויעזבו את-יהוה אלוהי אבותם, המוציא אותם מארץ מצריים, וילכו אחרי אלוהים אחרים מאלוהי העמים אשר סביבותיהם, וישתחוו להם; ויכעיסו, את-יהוה. יג ויעזבו, את-יהוה; ויעבדו לבעל, ולעשתרות. יד וייחר-אף יהוה, בישראל, וייתנם ביד-שוסים, וישוסו אותם; וימכרם ביד אויביהם, מסביב, ולא-יכלו עוד, לעמוד לפני אויביהם. טו בכול אשר יצאו, יד-יהוה הייתה-בם לרעה, כאשר דיבר יהוה, וכאשר נשבע יהוה להם; וייצר להם, מאוד. טז ויקם יהוה, שופטים; ויושיעום, מיד שוסיהם. יז וגם אל-שופטיהם, לא שמעו--כי זנו אחרי אלוהים אחרים, וישתחוו להם: סרו מהר, מן-הדרך אשר הלכו אבותם לשמוע מצוות-יהוה--לא-עשו כן. יח וכי-הקים יהוה להם, שופטים, והיה יהוה עם-השופט, והושיעם מיד אויביהם כול ימי השופט: כי-יינחם יהוה מנאקתם, מפני לוחציהם ודוחקיהם. יט והיה במות השופט, ישובו והשחיתו מאבותם, ללכת אחרי אלוהים אחרים, לעובדם ולהשתחוות להם: לא הפילו ממעלליהם, ומדרכם הקשה. כ וייחר-אף יהוה, בישראל; ויאמר, יען אשר עברו הגוי הזה את-בריתי אשר ציוויתי את-אבותם, ולא שמעו, לקולי. כא גם-אני לא אוסיף, להוריש איש מפניהם, מן-הגויים אשר-עזב יהושוע, וימות. כב למען נסות בם, את-ישראל: השומרים הם את-דרך יהוה ללכת בם, כאשר שמרו אבותם--אם-לא. כג וינח יהוה את-הגויים האלה, לבלתי הורישם מהר; ולא נתנם, ביד-יהושוע. {פ}
תנ"ך מנוקד
תנ"ך -
שופטים - הכול
פרק
א
ב
ג
ד
ה
ו
ז
ח
ט
י
יא
יב
יג
יד
טו
טז
יז
יח
יט
כ
כא