תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא

שופטים פרק י

א ויקם אחרי אבימלך להושיע את־ישראל, תולע בן־פואה בן־דודו--איש יששכר; והוא־יושב בשמיר, בהר אפריים.  ב וישפוט, את־ישראל, עשרים ושלוש, שנה; וימת, וייקבר בשמיר.  {פ}

ג ויקם אחריו, יאיר הגלעדי; וישפוט, את־ישראל, עשרים ושתיים, שנה.  ד ויהי־לו שלושים בנים, רוכבים על־שלושים עיירים, ושלושים עיירים, להם; להם יקראו חוות יאיר, עד היום הזה, אשר, בארץ הגלעד.  ה וימת יאיר, וייקבר בקמון.  {פ}

ו ויוסיפו בני ישראל, לעשות הרע בעיני יהוה, ויעבדו את־הבעלים ואת־העשתרות ואת־אלוהי ארם ואת־אלוהי צידון ואת אלוהי מואב ואת אלוהי בני־עמון, ואת אלוהי פלשתים; ויעזבו את־יהוה, ולא עבדוהו.  ז וייחר־אף יהוה, בישראל; וימכרם, ביד־פלשתים, וביד, בני עמון.  ח וירעצו וירוצצו את־בני ישראל, בשנה ההיא:  שמונה עשרה שנה, את־כל־בני ישראל אשר בעבר הירדן--בארץ האמורי, אשר בגלעד.  ט ויעברו בני־עמון את־הירדן, להילחם גם־ביהודה ובבנימין ובבית אפריים; ותצר לישראל, מאוד.  י ויזעקו בני ישראל, אל־יהוה לאמור:  חטאנו לך--וכי עזבנו את־אלוהינו, ונעבוד את־הבעלים.  {פ}

יא ויאמר יהוה, אל־בני ישראל:  הלוא ממצריים ומן־האמורי, ומן־בני עמון ומן־פלשתים.  יב וצידונים ועמלק ומעון, לחצו אתכם; ותצעקו אליי, ואושיעה אתכם מידם.  יג ואתם עזבתם אותי, ותעבדו אלוהים אחרים; לכן לא־אוסיף, להושיע אתכם.  יד לכו, וזעקו אל־האלוהים, אשר בחרתם, בם:  המה יושיעו לכם, בעת צרתכם.  טו ויאמרו בני־ישראל אל־יהוה, חטאנו--עשה־אתה לנו, ככל־הטוב בעיניך:  אך הצילנו נא, היום הזה.  טז ויסירו את־אלוהי הנכר, מקרבם, ויעבדו, את־יהוה; ותקצר נפשו, בעמל ישראל.  {פ}

יז וייצעקו בני עמון, ויחנו בגלעד; וייאספו בני ישראל, ויחנו במצפה.  יח ויאמרו העם שרי גלעד, איש אל־ריעהו, מי האיש, אשר יחל להילחם בבני עמון--יהיה לראש, לכול יושבי גלעד.  {פ}

תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא