תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא

שופטים פרק יד

א ויירד שמשון, תמנתה; וירא אישה בתמנתה, מבנות פלשתים.  ב ויעל, ויגד לאביו ולאימו, ויאמר אישה ראיתי בתמנתה, מבנות פלשתים; ועתה, קחו־אותה לי לאישה.  ג ויאמר לו אביו ואימו, האין בבנות אחיך ובכל־עמי אישה--כי־אתה הולך לקחת אישה, מפלשתים הערלים; ויאמר שמשון אל־אביו אותה קח־לי, כי־היא ישרה בעיניי.  ד ואביו ואימו לא ידעו, כי מיהוה היא--כי־תואנה הוא־מבקש, מפלשתים; ובעת ההיא, פלשתים מושלים בישראל.  ה ויירד שמשון ואביו ואימו, תמנתה; ויבואו, עד־כרמי תמנתה, והנה כפיר אריות, שואג לקראתו.  ו ותצלח עליו רוח יהוה, וישסעהו כשסע הגדי, ומאומה, אין בידו; ולא הגיד לאביו ולאימו, את אשר עשה.  ז ויירד, וידבר לאישה; ותישר, בעיני שמשון.  ח וישב מימים, לקחתה, ויסר לראות, את מפלת האריה; והנה עדת דבורים בגוויית האריה, ודבש.  ט וירדהו אל־כפיו, וילך הלוך ואכול, וילך אל־אביו ואל־אימו, וייתן להם ויאכלו; ולא־הגיד להם, כי מגוויית האריה רדה הדבש.  י ויירד אביהו, אל־האישה; ויעש שם שמשון משתה, כי כן יעשו הבחורים.  יא ויהי, כראותם אותו; ויקחו שלושים מריעים, ויהיו איתו.  יב ויאמר להם שמשון, אחודה־נא לכם חידה:  אם־הגד תגידו אותה לי שבעת ימי המשתה, ומצאתם--ונתתי לכם שלושים סדינים, ושלושים חליפות בגדים.  יג ואם־לא תוכלו, להגיד לי--ונתתם אתם לי שלושים סדינים, ושלושים חליפות בגדים; ויאמרו לו--חודה חידתך, ונשמענה.  יד ויאמר להם, מהאוכל יצא מאכל, ומעז, יצא מתוק; ולא יכלו להגיד החידה, שלושת ימים.  טו ויהי ביום השביעי, ויאמרו לאשת־שמשון פתי את־אישך ויגד־לנו את־החידה--פן־נשרוף אותך ואת־בית אביך, באש; הליירשנו, קראתם לנו הלוא.  טז ותבך אשת שמשון עליו, ותאמר רק־שנאתני ולא אהבתני--החידה חדת לבני עמי, ולי לא הגדת; ויאמר לה, הנה לאבי ולאימי לא הגדתי--ולך אגיד.  יז ותבך עליו שבעת הימים, אשר־היה להם המשתה; ויהי ביום השביעי, ויגד־לה כי הציקתהו, ותגד החידה, לבני עמה.  יח ויאמרו לו אנשי העיר ביום השביעי, בטרם יבוא החרסה, מה־מתוק מדבש, ומה עז מארי; ויאמר להם--לולא חרשתם בעגלתי, לא מצאתם חידתי.  יט ותצלח עליו רוח יהוה, ויירד אשקלון ויך מהם שלושים איש וייקח את־חליצותם, וייתן החליפות, למגידי החידה; וייחר אפו, ויעל בית אביהו.  כ ותהי, אשת שמשון, למריעהו, אשר ריעה לו.  {פ}

תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא