תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא

שופטים פרק יב

א וייצעק איש אפריים, ויעבור צפונה; ויאמרו ליפתח מדוע עברת להילחם בבני־עמון, ולנו לא קראת ללכת עימך--ביתך, נשרוף עליך באש.  ב ויאמר יפתח, אליהם, איש ריב הייתי אני ועמי ובני־עמון, מאוד; ואזעק אתכם, ולא־הושעתם אותי מידם.  ג ואראה כי־אינך מושיע, ואשימה נפשי בכפי ואעברה אל־בני עמון, וייתנם יהוה, בידי; ולמה עליתם אליי, היום הזה--להילחם בי.  ד ויקבוץ יפתח את־כל־אנשי גלעד, ויילחם את־אפריים; ויכו אנשי גלעד את־אפריים, כי אמרו פליטי אפריים אתם--גלעד, בתוך אפריים בתוך מנשה.  ה וילכוד גלעד את־מעברות הירדן, לאפריים; והיה כי יאמרו פליטי אפריים, אעבורה, ויאמרו לו אנשי־גלעד האפרתי אתה, ויאמר לא.  ו ויאמרו לו אמור־נא שיבולת ויאמר סיבולת, ולא יכין לדבר כן, ויאחזו אותו, וישחטוהו אל־מעברות הירדן; וייפול בעת ההיא, מאפריים, ארבעים ושניים, אלף.  ז וישפוט יפתח את־ישראל, שש שנים; וימת, יפתח הגלעדי, וייקבר, בערי גלעד.  {פ}

ח וישפוט אחריו את־ישראל, אבצן מבית לחם.  ט ויהי־לו שלושים בנים, ושלושים בנות שילח החוצה, ושלושים בנות, הביא לבניו מן־החוץ; וישפוט את־ישראל, שבע שנים.  י וימת אבצן, וייקבר בבית לחם.  {פ}

יא וישפוט אחריו את־ישראל, אילון הזבולוני; וישפוט את־ישראל, עשר שנים.  יב וימת, אילון הזבולוני; וייקבר באיילון, בארץ זבולון.  {פ}

יג וישפוט אחריו, את־ישראל, עבדון בן־הילל, הפרעתוני.  יד ויהי־לו ארבעים בנים, ושלושים בני בנים, רוכבים, על־שבעים עיירים; וישפוט את־ישראל, שמונה שנים.  טו וימת עבדון בן־הילל, הפרעתוני; וייקבר בפרעתון בארץ אפריים, בהר העמלקי.  {פ}

תנ"ך מנוקד
 
תנ"ך - שופטים - הכול
פרק א ב ג ד ה ו ז ח ט י יא יב יג יד טו טז יז יח יט כ כא