תרגום אונקלוס מנוקד

תרגום אונקלוס - ויקרא - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד כה כו כז

ויקרא פרק ט

א והוה, ביומא תמינאה, קרא משה, לאהרון ולבנוהי--ולסבי, ישראל. ב ואמר לאהרון, סב לך עיגל בר תורי לחטתא ודכר לעלתא--שלמין; וקריב, קודם ה'. ג ועם בני ישראל, תמליל למימר: סבו צפיר בר עיזין לחטתא, ועיגל ואימר בני שנא שלמין לעלתא. ד ותור ודכר לנכסת קודשיא, לדבחא קודם ה', ומנחתא, דפילא במשח: ארי יומא דין, יקרא דה' מתגלי לכון. ה וקריבו, ית דפקיד משה, לקדם, משכן זמנא; וקריבו, כל כנשתא, וקמו, קודם ה'. ו ואמר משה, דין פתגמא דפקיד ה' תעבדון--ויתגלי לכון, יקרא דה'. ז ואמר משה לאהרון, קרב למדבחא ועביד ית חטתך וית עלתך, וכפר עלך, ועל עמא; ועביד ית קורבן עמא, וכפר עליהון--כמא דפקיד ה'. ח וקריב אהרון, למדבחא; ונכס ית עגלא דחטתא, דיליה. ט וקריבו בני אהרון ית דמא, ליה, וטבל אצבעיה בדמא, ויהב על קרנת מדבחא; וית דמא אריק, ליסודא דמדבחא. י וית תרבא וית כולייתא וית חצרא מן כבדא, מן חטתא--אסיק, למדבחא: כמא דפקיד ה', ית משה. יא וית בסרא, וית משכא, אוקיד בנורא, מברא למשריתא. יב ונכס, ית עלתא; ואמטיאו בני אהרון ליה, ית דמא, וזרקיה על מדבחא, סחור סחור. יג וית עלתא, אמטיאו ליה לאברהא--וית רישא; ואסיק, על מדבחא. יד וחליל ית גווא, וית כרעיא; ואסיק על עלתא, למדבחא. טו וקריב, ית קורבן עמא; ונסיב ית צפירא דחטתא, דלעמא, ונכסיה וכפר בדמיה, כקדמאה. טז וקריב, ית עלתא; ועבדה, כדחזי. יז וקריב, ית מנחתא, ומלא ידיה מינה, ואסיק על מדבחא--בר מעלת צפרא. יח ונכס ית תורא וית דכרא, נכסת קודשיא דלעמא; ואמטיאו בני אהרון ית דמא, ליה, וזרקיה על מדבחא, סחור סחור. יט וית תרביא, מן תורא; ומן דכרא--אלייתא וחפי גווא וכולייתא, וחצר כבדא. כ ושוויאו ית תרביא, על חדוותא; ואסיק תרביא, למדבחא. כא וית חדוותא, וית שקא דימינא, ארים אהרון ארמא, קודם ה'--כמא דפקיד משה. כב וארים אהרון ית ידוהי לעמא, ובריכינון; ונחת, מלמעבד חטתא ועלתא--ונכסת קודשיא. כג ועל משה ואהרון, למשכן זמנא, ונפקו, ובריכו ית עמא; ואתגלי יקרא דה', לכל עמא. כד ונפקת אישתא, מן קודם ה', ואכלת על מדבחא, ית עלתא וית תרביא; וחזא כל עמא ושבחו, ונפלו על אפיהון.