תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג

עזרא פרק א

א ובשנת אחת, לכורש מלך פרס, לכלות דבר־יהוה, מפי ירמיה:  העיר יהוה, את־רוח כורש מלך־פרס, ויעבר־קול בכל־מלכותו, וגם־במכתב לאמור.  ב כה אמר, כורש מלך פרס--כול ממלכות הארץ, נתן לי יהוה אלוהי השמיים; והוא־פקד עליי לבנות־לו בית, בירושלים אשר ביהודה.  ג מי־בכם מכל־עמו, יהי אלוהיו עימו, ויעל, לירושלים אשר ביהודה; וייבן, את־בית יהוה אלוהי ישראל--הוא האלוהים, אשר בירושלים.  ד וכל־הנשאר, מכל־המקומות אשר הוא גר־שם--ינשאוהו אנשי מקומו, בכסף ובזהב וברכוש ובבהמה; עם־הנדבה--לבית האלוהים, אשר בירושלים.  ה ויקומו ראשי האבות, ליהודה ובנימין, והכוהנים, והלויים; לכול העיר האלוהים, את־רוחו, לעלות לבנות, את־בית יהוה אשר בירושלים.  ו וכל־סביבותיהם חיזקו בידיהם, בכלי־כסף בזהב ברכוש ובבהמה ובמגדנות--לבד, על־כל־התנדב.  {ס}

ז והמלך כורש, הוציא את־כלי בית־יהוה, אשר הוציא נבוכדנאצר מירושלים, וייתנם בבית אלוהיו.  ח ויוציאם, כורש מלך פרס, על־יד, מתרדת הגזבר; ויספרם, לששבצר, הנשיא, ליהודה.  ט ואלה, מספרם:  אגרטלי זהב שלושים, אגרטלי־כסף אלף, מחלפים, תשעה ועשרים.  {ס}

י כפורי זהב, שלושים--  {ס}  כפורי כסף משנים, ארבע מאות ועשרה; כלים אחרים, אלף.  {ס}

יא כל־כלים לזהב ולכסף, חמשת אלפים וארבע מאות; הכול העלה ששבצר, עם היעלות הגולה--מבבל, לירושלים.  {פ}

תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג