תנ"ך מנוקד
תנ"ך -
עזרא / נחמיה - הכול
עזרא פרק
א
ב
ג
ד
ה
ו
ז
ח
ט
י
- נחמיה פרק
א
ב
ג
ד
ה
ו
ז
ח
ט
י
יא
יב
יג
א והתנבי חגי נבייא, וזכריה בר-עידוא נבייאיא, על-יהודיא, די ביהוד ובירושלם--בשום אלה ישראל, עליהון. {ס}
ב באדיין קמו זרובבל בר-שאלתיאל, וישוע בר-יוצדק, ושריו למבני, בית אלהא די בירושלם; ועימהון נבייאיא די-אלהא, מסעדין להון. {פ}
ג ביה-זמנא אתא עליהון תתניי פחת עבר-נהרה, ושתר בוזניי--וכנוותהון; וכן, אמרין להום--מן-שם לכום טעים ביתא דנה ליבני, ואושרנא דנה לשכללה. {ס}
ד אדיין כנימא, אמרנא להום: מן-אינון שמהת גובריא, די-דנה בניינא בניין. ה ועין אלההום, הות על-שבי יהודיא, ולא-בטילו הימו, עד-טעמא לדריווש יהך; ואדיין יתיבון נשתוונא, על-דנה. {פ}
ו פרשגן איגרתא די-שלח תתניי פחת עבר-נהרה, ושתר בוזניי וכנוותיה, אפרסכיא, די בעבר נהרה--על-דריווש, מלכא. ז פתגמא, שלחו עלוהי; וכדנה כתיב בגוויה, לדריווש מלכא שלמא כולא. {ס}
ח ידיע להוי למלכא, די-אזלנא ליהוד מדינתא לבית אלהא רבא, והוא מתבני אבן גלל, ואע מיתשם בכותליא; ועבידתא דך אוספרנא מתעבדא, ומצלח בידהום. {ס}
ט אדיין, שאילנא לשביא איליך, כנימא, אמרנא להום: מן-שם לכום טעים, ביתא דנה למבניה, ואושרנא דנה, לשכללה. י ואף שמהתהום שאילנא להום, להודעותך--די נכתוב שום-גובריא, די בראשיהום. {ס}
יא וכנימא פתגמא, התיבונא למימר: אנחנא הימו עבדוהי די-אלה שמיא וארעא, ובניין ביתא די-הוה בני מקדמת דנה שנין שגיאן, ומלך לישראל רב, בנהי ושכלליה. יב להן, מן-די הרגיזו אבהתנא לאלה שמיא--יהב הימו, ביד נבוכדנאצר מלך-בבל כסדאה; וביתה דנה סתריה, ועמה הגלי לבבל. {ס}
יג ברם בשנת חדה, לכורש מלכא די בבל--כורש מלכא שם טעים, בית-אלהא דנה ליבני. יד ואף מאניא די-בית-אלהא, די דהבה וכספא, די נבוכדנאצר הנפיק מן-היכלא די בירושלם, והיביל הימו להיכלא די בבל--הנפיק הימו כורש מלכא, מן-היכלא די בבל, ויהיבו לששבצר שמיה, די פחה שמיה. טו ואמר-ליה--אל מאניא, שיא איזל-אחית הימו בהיכלא די בירושלם; ובית אלהא, יתבני על-אתריה. {ס}
טז אדיין, ששבצר דיך, אתא יהב אושיא די-בית אלהא, די בירושלם; ומן-אדיין ועד-כען מתבני, ולא שלים. יז וכען הן על-מלכא טב, יתבקר בבית גנזיא די-מלכא תמה די בבבל, הן איתיי די-מן-כורש מלכא שים טעים, למבני בית-אלהא דיך בירושלם; ורעות מלכא על-דנה, ישלח עלינא. {ס}
תנ"ך מנוקד
תנ"ך -
עזרא / נחמיה - הכול
עזרא פרק
א
ב
ג
ד
ה
ו
ז
ח
ט
י
- נחמיה פרק
א
ב
ג
ד
ה
ו
ז
ח
ט
י
יא
יב
יג