תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג

נחמיה פרק ה

א ותהי צעקת העם ונשיהם, גדולה, אל־אחיהם, היהודים.  ב ויש אשר אומרים, בנינו ובנותינו אנחנו רבים; ונקחה דגן, ונאכלה ונחיה.  ג ויש אשר אומרים, שדותינו וכרמינו ובתינו אנחנו עורבים; ונקחה דגן, ברעב.  ד ויש אשר אומרים, לווינו כסף למידת המלך, שדותינו, וכרמינו.  ה ועתה, כבשר אחינו בשרנו, כבניהם, בנינו; והנה אנחנו כובשים את־בנינו ואת־בנותינו לעבדים, ויש מבנותינו נכבשות ואין לאל ידנו, ושדותינו וכרמינו, לאחרים.  ו וייחר לי, מאוד, כאשר שמעתי את־זעקתם, ואת הדברים האלה.  ז ויימלך ליבי עליי, ואריבה את־החורים ואת־הסגנים, ואומרה להם, משא איש־באחיו אתם נושים; ואתן עליהם, קהילה גדולה.  ח ואומרה להם, אנחנו קנינו את־אחינו היהודים הנמכרים לגויים כדי בנו, וגם־אתם תמכרו את־אחיכם, ונמכרו־לנו; ויחרישו, ולא מצאו דבר.  {ס}

ט ואומר, לא־טוב הדבר אשר־אתם עושים:  הלוא ביראת אלוהינו תלכו, מחרפת הגויים אויבינו.  י וגם־אני אחיי ונעריי, נושים בהם כסף ודגן; נעזבה־נא, את־המשא הזה.  יא השיבו נא להם כהיום, שדותיהם כרמיהם זיתיהם--ובתיהם; ומאת הכסף והדגן התירוש והיצהר, אשר אתם נושים בהם.  יב ויאמרו נשיב, ומהם לא נבקש--כן נעשה, כאשר אתה אומר; ואקרא, את־הכוהנים, ואשביעם, לעשות כדבר הזה.  יג גם־חוצני נערתי, ואומרה ככה ינער האלוהים את־כל־האיש אשר לא־יקים את־הדבר הזה מביתו ומיגיעו, וככה יהיה נעור, וריק; ויאמרו כל־הקהל אמן, ויהללו את־יהוה, ויעש העם, כדבר הזה.  יד גם מיום אשר־ציווה אותי, להיות פחם בארץ יהודה, משנת עשרים ועד שנת שלושים ושתיים לארתחשסתא המלך, שנים שתים עשרה--אני ואחיי, לחם הפחה לא אכלתי.  טו והפחות הראשונים אשר־לפניי הכבידו על־העם, ויקחו מהם בלחם ויין אחר כסף־שקלים ארבעים--גם נעריהם, שלטו על־העם; ואני לא־עשיתי כן, מפני יראת אלוהים.  טז וגם במלאכת החומה הזאת, החזקתי, ושדה, לא קנינו; וכל־נעריי--קבוצים שם, על־המלאכה.  יז והיהודים והסגנים מאה וחמישים איש, והבאים אלינו מן־הגויים אשר־סביבותינו--על־שולחני.  יח ואשר היה נעשה ליום אחד, שור אחד צאן שש־ברורות וציפורים נעשו־לי, ובין עשרת ימים בכל־יין, להרבה; ועם־זה, לחם הפחה לא ביקשתי--כי־כבדה העבודה, על־העם הזה.  יט זוכרה־לי אלוהיי, לטובה--כול אשר־עשיתי, על־העם הזה.  {פ}

תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג