תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג

נחמיה פרק ח

א וייאספו כל-העם, כאיש אחד, אל-הרחוב, אשר לפני שער-המים; ויאמרו, לעזרא הסופר--להביא את-ספר תורת משה, אשר-ציווה יהוה את-ישראל.  ב ויביא עזרא הכוהן את-התורה לפני הקהל, מאיש ועד-אישה, וכול, מבין לשמוע--ביום אחד, לחודש השביעי.  ג ויקרא-בו לפני הרחוב אשר לפני שער-המים, מן-האור עד-מחצית היום--נגד האנשים והנשים, והמבינים; ואוזני כל-העם, אל-ספר התורה.  ד ויעמוד עזרא הסופר, על-מגדל-עץ אשר עשו לדבר, ויעמוד אצלו מתיתיה ושמע ועניה ואורייה וחלקייה ומעשיה, על-ימינו; ומשמאלו, פדיה ומישאל ומלכייה וחשום וחשבדנה--זכריה משולם.  {פ}

ה ויפתח עזרא הספר לעיני כל-העם, כי-מעל כל-העם היה; וכפתחו, עמדו כל-העם.  ו ויברך עזרא, את-יהוה האלוהים הגדול; ויענו כל-העם אמן אמן, במועל ידיהם, וייקדו וישתחוו ליהוה, אפיים ארצה.  ז וישוע ובני ושרביה ימין עקוב שבתיי הודייה מעשיה קליטא עזריה יוזבד חנן פלאיה, והלויים--מבינים את-העם, לתורה; והעם, על-עומדם.  ח ויקראו בספר בתורת האלוהים, מפורש; ושום שכל, ויבינו במקרא.  {ס}

ט ויאמר נחמיה הוא התרשתא ועזרא הכוהן הסופר והלויים המבינים את-העם לכל-העם, היום קדוש-הוא ליהוה אלוהיכם--אל-תתאבלו, ואל-תבכו:  כי בוכים כל-העם, כשומעם את-דברי התורה.  י ויאמר להם לכו אכלו משמנים ושתו ממתקים, ושלחו מנות לאין נכון לו--כי-קדוש היום, לאדונינו; ואל-תיעצבו, כי-חדוות יהוה היא מעוזכם.  יא והלויים מחשים לכל-העם, לאמור הסו--כי היום, קדוש; ואל-תיעצבו.  יב וילכו כל-העם לאכול ולשתות, ולשלח מנות, ולעשות, שמחה גדולה:  כי הבינו בדברים, אשר הודיעו להם.  {ס}

יג וביום השני נאספו ראשי האבות לכל-העם, הכוהנים והלויים, אל-עזרא, הסופר--ולהשכיל, אל-דברי התורה.  יד וימצאו, כתוב בתורה:  אשר ציווה יהוה ביד-משה, אשר יישבו בני-ישראל בסוכות בחג בחודש השביעי.  טו ואשר ישמיעו, ויעבירו קול בכל-עריהם ובירושלים לאמור--צאו ההר והביאו עלי-זית ועלי-עץ שמן, ועלי הדס ועלי תמרים ועלי עץ עבות:  לעשות סוכות, ככתוב.  {פ}

טז וייצאו העם, ויביאו, ויעשו להם סוכות איש על-גגו ובחצרותיהם, ובחצרות בית האלוהים--וברחוב שער המים, וברחוב שער אפריים.  יז ויעשו כל-הקהל השבים מן-השבי סוכות, ויישבו בסוכות--כי לא-עשו מימי ישוע בן-נון כן בני ישראל, עד היום ההוא; ותהי שמחה, גדולה מאוד.  יח ויקרא בספר תורת האלוהים, יום ביום--מן-היום הראשון, עד היום האחרון; ויעשו-חג שבעת ימים, וביום השמיני עצרת כמשפט.  {פ}

תנ"ך מנוקד
 
תנ"ך - עזרא / נחמיה - הכול
עזרא פרק א ב ג ד ה ו ז ח ט י - נחמיה פרק א ב ג ד ה ו ז ח ט י יא יב יג