תנ"ך מנוקד
 
תנ"ך - הושע - הכול
פרק א ב ג ד ה ו ז ח ט י יא יב יג יד

הושע פרק יג

א כדבר אפריים רתת, נשא הוא בישראל; ויאשם בבעל, וימות.  ב ועתה יוסיפו לחטוא, ויעשו להם מסכה מכספם כתבונם עצבים, מעשה חרשים, כולו; להם, הם אומרים, זובחי אדם, עגלים יישקון.  ג לכן, יהיו כענן־בוקר, וכטל, משכים הולך; כמוץ יסוער מגורן, וכעשן מארובה.  ד ואנוכי יהוה אלוהיך, מארץ מצריים; ואלוהים זולתי לא תדע, ומושיע אין בלתי.  ה אני ידעתיך, במדבר--בארץ, תלאובות.  ו כמרעיתם, וישבעו--שבעו, וירם ליבם; על־כן, שכחוני.  ז ואהי להם, כמו־שחל--כנמר, על־דרך אשור.  ח אפגשם כדוב שכול, ואקרע סגור ליבם; ואוכלם שם כלביא, חית השדה תבקעם.  ט שיחתך ישראל, כי־בי בעזרך.  י אהי מלכך איפוא, ויושיעך בכל־עריך; ושופטיך--אשר אמרת, תנה־לי מלך ושרים.  יא אתן־לך מלך באפי, ואקח בעברתי.  {פ}

יב צרור עוון אפריים, צפונה חטאתו.  יג חבלי יולדה, יבואו לו; הוא־בן לא חכם, כי־עת לא־יעמוד במשבר בנים.  יד מיד שאול אפדם, ממוות אגאלם; אהי דבריך מוות, אהי קוטבך שאול--נוחם, ייסתר מעיניי.  טו כי הוא, בין אחים יפריא; יבוא קדים רוח יהוה ממדבר עולה, ויבוש מקורו ויחרב מעיינו--הוא ישסה, אוצר כל־כלי חמדה.

תנ"ך מנוקד
 
תנ"ך - הושע - הכול
פרק א ב ג ד ה ו ז ח ט י יא יב יג יד