תנ"ך מנוקד
 
תנ"ך - הושע - הכול
פרק א ב ג ד ה ו ז ח ט י יא יב יג יד

הושע פרק ב

א והיה מספר בני־ישראל, כחול הים, אשר לא־יימד, ולא ייספר; והיה במקום אשר־ייאמר להם, לא־עמי אתם, ייאמר להם, בני אל־חי.  ב ונקבצו בני־יהודה ובני־ישראל, יחדיו, ושמו להם ראש אחד, ועלו מן־הארץ:  כי גדול, יום יזרעאל.  ג אמרו לאחיכם, עמי; ולאחותיכם, רוחמה.  ד ריבו באימכם, ריבו--כי־היא לא אשתי, ואנוכי לא אישה; ותסר זנוניה מפניה, ונאפופיה מבין שדיה.  ה פן־אפשיטנה ערומה--והצגתיה, כיום היוולדה; ושמתיה כמדבר, ושתיה כארץ צייה, והמיתיה, בצמא.  ו ואת־בניה, לא ארחם:  כי־בני זנונים, המה.  ז כי זנתה אימם, הובישה הורתם:  כי אמרה, אלכה אחרי מאהביי נותני לחמי ומימיי, צמרי ופשתי, שמני ושיקויי.  ח לכן הנני־שך את־דרכך, בסירים; וגדרתי את־גדרה, ונתיבותיה לא תמצא.  ט ורידפה את־מאהביה ולא־תשיג אותם, וביקשתם ולא תמצא; ואמרה, אלכה ואשובה אל־אישי הראשון--כי טוב לי אז, מעתה.  י והיא, לא ידעה, כי אנוכי נתתי לה, הדגן והתירוש והיצהר; וכסף הרביתי לה וזהב, עשו לבעל.  יא לכן אשוב--ולקחתי דגני בעיתו, ותירושי במועדו; והצלתי צמרי ופשתי, לכסות את־ערוותה.  יב ועתה אגלה את־נבלותה, לעיני מאהביה; ואיש, לא־יצילנה מידי.  יג והשבתי, כל־משושה, חגה, חודשה ושבתה--וכול, מועדה.  יד והשימותי, גפנה ותאנתה, אשר אמרה אתנה המה לי, אשר נתנו־לי מאהביי; ושמתים ליער, ואכלתם חית השדה.  טו ופקדתי עליה, את־ימי הבעלים אשר תקטיר להם, ותעד נזמה וחלייתה, ותלך אחרי מאהביה; ואותי שכחה, נאום־יהוה.  {ס}

טז לכן, הנה אנוכי מפתיה, והולכתיה, המדבר; ודיברתי, על־ליבה.  יז ונתתי לה את־כרמיה משם, ואת־עמק עכור לפתח תקווה; וענתה שמה כימי נעוריה, וכיום עלותה מארץ־מצריים.  יח והיה ביום־ההוא נאום־יהוה, תקראי אישי; ולא־תקראי־לי עוד, בעלי.  יט והסירותי את־שמות הבעלים, מפיה; ולא־ייזכרו עוד, בשמם.  כ וכרתי להם ברית, ביום ההוא, עם־חית השדה ועם־עוף השמיים, ורמש האדמה; וקשת וחרב ומלחמה אשבור מן־הארץ, והשכבתים לבטח.  כא ואירשתיך לי, לעולם; ואירשתיך לי בצדק ובמשפט, ובחסד וברחמים.  כב ואירשתיך לי, באמונה; וידעת, את־יהוה.  {פ}

כג והיה ביום ההוא, אענה נאום־יהוה--אענה, את־השמיים; והם, יענו את־הארץ.  כד והארץ תענה, את־הדגן ואת־התירוש ואת־היצהר; והם, יענו את־יזרעאל.  כה וזרעתיה לי בארץ, וריחמתי את־לא רוחמה; ואמרתי ללא־עמי עמי־אתה, והוא יאמר אלוהיי.  {פ}

תנ"ך מנוקד
 
תנ"ך - הושע - הכול
פרק א ב ג ד ה ו ז ח ט י יא יב יג יד