תנ"ך מנוקד
 
תנ"ך - יהושוע - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד

יהושוע פרק ג

א וישכם יהושוע בבוקר ויסעו מהשיטים, ויבואו עד־הירדן--הוא, וכל־בני ישראל; וילינו שם, טרם יעבורו.  ב ויהי, מקצה שלושת ימים; ויעברו השוטרים, בקרב המחנה.  ג ויצוו, את־העם לאמור, כראותכם את ארון ברית־יהוה אלוהיכם, והכוהנים הלויים נושאים אותו--ואתם, תסעו ממקומכם, והלכתם, אחריו.  ד אך רחוק יהיה, ביניכם וביניו, כאלפיים אמה, במידה:  אל־תקרבו אליו, למען אשר־תדעו את־הדרך אשר תלכו־בה--כי לא עברתם בדרך, מתמול שלשום.  {פ}

ה ויאמר יהושוע אל־העם, התקדשו:  כי מחר, יעשה יהוה בקרבכם--נפלאות.  ו ויאמר יהושוע, אל־הכוהנים לאמור, שאו את־ארון הברית, ועברו לפני העם; וישאו את־ארון הברית, וילכו לפני העם.  {ס}

ז ויאמר יהוה, אל־יהושוע, היום הזה אחל גדלך, בעיני כל־ישראל:  אשר, יידעון, כי כאשר הייתי עם־משה, אהיה עימך.  ח ואתה, תצווה את־הכוהנים, נושאי ארון־הברית, לאמור:  כבואכם, עד־קצה מי הירדן, בירדן, תעמודו.  {פ}

ט ויאמר יהושוע, אל־בני ישראל:  גושו הנה--ושמעו, את־דברי יהוה אלוהיכם.  י ויאמר יהושוע--בזאת תדעון, כי אל חי בקרבכם; והורש יוריש מפניכם את־הכנעני ואת־החיתי ואת־החיווי, ואת־הפריזי ואת־הגרגשי, והאמורי, והיבוסי.  יא הנה ארון הברית, אדון כל־הארץ, עובר לפניכם, בירדן.  יב ועתה, קחו לכם שני עשר איש, משבטי, ישראל--איש־אחד איש־אחד, לשבט.  יג והיה כנוח כפות רגלי הכוהנים נושאי ארון יהוה אדון כל־הארץ, במי הירדן, מי הירדן ייכרתון, המים היורדים מלמעלה; ויעמדו, נד אחד.  יד ויהי, בנסוע העם מאוהליהם, לעבור, את־הירדן; והכוהנים, נושאי הארון הברית--לפני העם.  טו וכבוא נושאי הארון, עד־הירדן, ורגלי הכוהנים נושאי הארון, נטבלו בקצה המים; והירדן, מלא על־כל־גדותיו, כול, ימי קציר.  טז ויעמדו המים היורדים מלמעלה קמו נד־אחד, הרחק מאוד מאדם העיר אשר מצד צרתן, והיורדים על ים הערבה ים־המלח, תמו נכרתו; והעם עברו, נגד יריחו.  יז ויעמדו הכוהנים נושאי הארון ברית־יהוה בחרבה, בתוך הירדן--הכן; וכל־ישראל, עוברים בחרבה, עד אשר־תמו כל־הגוי, לעבור את־הירדן.

תנ"ך מנוקד
 
תנ"ך - יהושוע - הכול
פרק א ב ג ד ה ו ז ח ט י יא יב יג יד טו טז יז יח יט כ כא כב כג כד