תנ"ך מנוקד
 
תנ"ך - זכריה - הכול
פרק א ב ג ד ה ו ז ח ט י יא יב יג יד

זכריה פרק ה

א ואשוב, ואשא עיניי ואראה; והנה, מגילה עפה.  ב ויאמר אליי, מה אתה רואה; ואומר, אני רואה מגילה עפה--אורכה עשרים באמה, ורוחבה עשר באמה.  ג ויאמר אליי--זאת האלה, היוצאת על־פני כל־הארץ:  כי כל־הגונב, מזה כמוה ניקה, וכל־הנשבע, מזה כמוה ניקה.  ד הוצאתיה, נאום יהוה צבאות, ובאה אל־בית הגנב, ואל־בית הנשבע בשמי לשקר; ולנה בתוך ביתו, וכילתו ואת־עציו ואת־אבניו.  ה וייצא, המלאך הדובר בי; ויאמר אליי--שא נא עיניך וראה, מה היוצאת הזאת.  ו ואומר, מה־היא; ויאמר, זאת האיפה היוצאת, ויאמר, זאת עינם בכל־הארץ.  ז והנה כיכר עופרת, נישאת; וזאת אישה אחת, יושבת בתוך האיפה.  ח ויאמר זאת הרשעה, וישלך אותה אל־תוך האיפה; וישלך את־אבן העופרת, אל־פיה.  {ס}

ט ואשא עיניי וארא, והנה שתיים נשים יוצאות ורוח בכנפיהם, ולהנה כנפיים, ככנפי החסידה; ותישאנה, את־האיפה, בין הארץ, ובין השמיים.  י ואומר, אל־המלאך הדובר בי:  אנה המה מוליכות, את־האיפה.  יא ויאמר אליי, לבנות־לה בית בארץ שנער; והוכן והוניחה שם, על־מכונתה.  {ס}

תנ"ך מנוקד
 
תנ"ך - זכריה - הכול
פרק א ב ג ד ה ו ז ח ט י יא יב יג יד