תנ"ך - איוב - הכול פרק כו  
האזנה לפרק זה

איוב פרק כו

א                  וַיַּעַן אִיּוֹב, וַיֹּאמַר.
ב  מֶה־עָזַרְתָּ, לְלֹא־כֹחַ;    הוֹשַׁעְתָּ, זְרוֹעַ לֹא־עֹז.
ג  מַה־יָּעַצְתָּ, לְלֹא חָכְמָה;    וְתֻשִׁיָּה, לָרֹב הוֹדָעְתָּ.
ד  אֶת־מִי, הִגַּדְתָּ מִלִּין;    וְנִשְׁמַת־מִי, יָצְאָה מִמֶּךָּ.
ה  הָרְפָאִים יְחוֹלָלוּ--    מִתַּחַת מַיִם, וְשֹׁכְנֵיהֶם.
ו  עָרוֹם שְׁאוֹל נֶגְדּוֹ;    וְאֵין כְּסוּת, לָאֲבַדּוֹן.
ז  נֹטֶה צָפוֹן עַל־תֹּהוּ;    תֹּלֶה אֶרֶץ, עַל־בְּלִי־מָה.
ח  צֹרֵר־מַיִם בְּעָבָיו;    וְלֹא־נִבְקַע עָנָן תַּחְתָּם.
ט  מְאַחֵז פְּנֵי־כִסֵּה;    פַּרְשֵׁז עָלָיו עֲנָנוֹ.
י  חֹק־חָג, עַל־פְּנֵי־מָיִם--    עַד־תַּכְלִית אוֹר עִם־חֹשֶׁךְ.
יא  עַמּוּדֵי שָׁמַיִם יְרוֹפָפוּ;    וְיִתְמְהוּ, מִגַּעֲרָתוֹ.
יב  בְּכֹחוֹ, רָגַע הַיָּם;    ובתובנתו וּבִתְבוּנָתוֹ, מָחַץ רָהַב.
יג  בְּרוּחוֹ, שָׁמַיִם שִׁפְרָה;    חֹלְלָה יָדוֹ, נָחָשׁ בָּרִחַ.
יד  הֶן־אֵלֶּה, קְצוֹת דְּרָכָו--    וּמַה־שֵּׁמֶץ דָּבָר, נִשְׁמַע־בּוֹ;
וְרַעַם גְּבוּרֹתָו,    מִי יִתְבּוֹנָן.

תנ"ך - איוב - הכול פרק כו