תנ"ך - דברי הימים - הכולדברי הימים א פרק - דברי הימים ב פרק כז  
האזנה לפרק זה

דברי הימים ב פרק כז

א בֶּן-עֶשְׂרִים וְחָמֵשׁ שָׁנָה, יוֹתָם בְּמָלְכוֹ, וְשֵׁשׁ-עֶשְׂרֵה שָׁנָה, מָלַךְ בִּירוּשָׁלִָם; וְשֵׁם אִמּוֹ, יְרוּשָׁה בַּת-צָדוֹק.  ב וַיַּעַשׂ הַיָּשָׁר בְּעֵינֵי יְהוָה, כְּכֹל אֲשֶׁר-עָשָׂה עֻזִּיָּהוּ אָבִיו--רַק, לֹא-בָא אֶל-הֵיכַל יְהוָה; וְעוֹד הָעָם, מַשְׁחִיתִים.  ג הוּא, בָּנָה אֶת-שַׁעַר בֵּית-יְהוָה--הָעֶלְיוֹן; וּבְחוֹמַת הָעֹפֶל בָּנָה, לָרֹב.  ד וְעָרִים בָּנָה, בְּהַר-יְהוּדָה; וּבֶחֳרָשִׁים בָּנָה, בִּירָנִיּוֹת וּמִגְדָּלִים.  ה וְהוּא נִלְחַם עִם-מֶלֶךְ בְּנֵי-עַמּוֹן, וַיֶּחֱזַק עֲלֵיהֶם, וַיִּתְּנוּ-לוֹ בְנֵי-עַמּוֹן בַּשָּׁנָה הַהִיא מֵאָה כִּכַּר-כֶּסֶף, וַעֲשֶׂרֶת אֲלָפִים כֹּרִים חִטִּים וּשְׂעוֹרִים עֲשֶׂרֶת אֲלָפִים:  זֹאת, הֵשִׁיבוּ לוֹ בְּנֵי עַמּוֹן, וּבַשָּׁנָה הַשֵּׁנִית, וְהַשְּׁלִשִׁית.  ו וַיִּתְחַזֵּק, יוֹתָם:  כִּי הֵכִין דְּרָכָיו, לִפְנֵי יְהוָה אֱלֹהָיו.  ז וְיֶתֶר דִּבְרֵי יוֹתָם, וְכָל-מִלְחֲמֹתָיו וּדְרָכָיו--הִנָּם כְּתוּבִים, עַל-סֵפֶר מַלְכֵי-יִשְׂרָאֵל וִיהוּדָה.  ח בֶּן-עֶשְׂרִים וְחָמֵשׁ שָׁנָה, הָיָה בְמָלְכוֹ; וְשֵׁשׁ-עֶשְׂרֵה שָׁנָה, מָלַךְ בִּירוּשָׁלִָם.  ט וַיִּשְׁכַּב יוֹתָם עִם-אֲבֹתָיו, וַיִּקְבְּרוּ אֹתוֹ בְּעִיר דָּוִיד; וַיִּמְלֹךְ אָחָז בְּנוֹ, תַּחְתָּיו.  {פ}

תנ"ך - דברי הימים - הכול
דברי הימים א פרק - דברי הימים ב פרק כז